Jun wo’ ex jun wiẍ
[1]Chitzun qa jun maj, atitaq jun nitz’ wo’ toj tb’e a’. Na’mxtaq tel sak’, tzmaxixtaq nleqpije toj xoq’l. Jun maj, kub’ tximin tu’n tok ten lipil noqx jachaq taj. ¡Ma b’ant nlipane, ma b’ant nlipane! chi. Oxix tze’je nitz’[2]wo’.
Jun maj, jup kub’ tnab’il wo’. Ok ten lipil. Mixti’ ul tuj tnab’il qa otaq tz’el laq’e tk’etz tb’e a’. Nimxi’x otaq tz’el laq’eya. Otaq pon toj nim quq. Antza ok yupje.
Nim jaw b’isin nitz’ wo’. Okten oq’il tu’n nim we’yaj ex k’waj. Otaq kub’ jilj. Mixti’ tuj tnab’il tej tpon jun wi tk’atz. ¡Je’ky! Titzun nb’ajteya? Chi wiẍ te nitz’ wo’.
Tu’n ikyju, ok ten wiẍ chal ti’j nitz’ wo’. El tklo’n tib’ wo’, b’e’x ok ten lipil, lipil, lipil. Tej ttzaj tna’n tib’ otaq pon ttzi nim a’. Txul txi’ toj a’ ex b’e’x kyej qe wiẍ ikyju.
Tojxi’ juntl q’ij kub’ tb’isin kjalu’n: Chjonte te wi xmojin wi’ja tu’n nkanina toj a’. Tb’anilxix nchwinqlila ja’la, chi nitz’ wo’. Tb’anil nab’il:
Qa ati mya b’a’n sul kanin qi’j, mi’n qo jaw b’isin. B’an tu’n tjaw qiq’in qib’.
Comitancillo, San Marcos
