Ralanxax ri a Lu’

Archivo:Antología de cuentos II - identificador en k'iche' - horizontal.png

Ub’antajik tzij

Pa uwajxaq ujunab’ ri a Lu’, ri utat xub’an jun nim alaj sipanik che. Xusipaj jun alaj uche’ alanxax, xub’ij che: walk’wa’l, we jun sipanik nim ub’antajik. Rajawaxik kawilij, rech je’l taq alanxax kuya’ chawe.

Ri a Lu' sib’alaj xumaltyoxij che ri utat, le nimalaj sipanik xub’an che. Aninaqil xuk’am b’i ri rasarun xb’e pa ri taq’aj k’o chirij ri rachoch. Xutika ri alanxax, ronojel taq aq’ab’il kuja’j ri alanxax. Sib’alaj xuchajij, tek’u ri’ xrilo ri alanxax nojimal xk’iyik xuquje’ xwachin uwach.

Xopan jun q’ij ri alanxax xumaj uk’otz’ijanik. Sib’alaj je’l kape ri saq taq kotz’ij chirij ri uche’al ri alanxax. Xq’atan nik’aj taq q’ij ri kotz’ij re ri alanxax xuya’ q’an taq uwach.

Ri a Lu’ xutzukuj ri nab’e taq alanxax. Xuya’ jun che ri uwachulew, che umaltyoxinik che ri nab’e taq alanxax. Ri nik’aj taq uwach chik, xumolo, tek’u ri’ xuk’amb’i pa k’ayb’al che uk’ayixik.

Ruk’ ri pwaq xuch’ako, xuloq’ jastaq rajawaxik pa rachoch. Ri unan utat, sib’alaj xekiko’t, rumal chi xub’an upatan ri sipanik xb’an chech.

José Xiloj Itzep
Momostenango, Totonicapán.